பாண்டிராஜ் இயக்கத்தில், சந்தோஷ் நாராயணனின் இசையில், விஜய் சேதுபதி மற்றும் நித்யா மேனன் முக்கிய கதாபாத்திரங்களில் நடித்துள்ள ‘தலைவன் தலைவி’ திரைப்படம் (ஜூலை 25) தமிழில் வெளியாகியுள்ளது. படக்குழு வெளியிட்ட தகவலின்படி, இப்படத்தின் தமிழ்ப் பதிப்பு உலகம் முழுவதும் சுமார் 1000 தியேட்டர்களில் வெளியிடப்பட்டுள்ளது.

ஆனால், இதே படத்தின் தெலுங்குப் பதிப்பான ‘சார் மேடம்’ இன்று வெளியாக வேண்டியிருந்தாலும், எந்தவிதமான வெளியீடு நிகழவில்லை. மேலும், ஆன்லைனில் முன்பதிவு வசதியும் திறக்கப்படாதது தெலுங்கு ரசிகர்களிடையே குழப்பத்தை ஏற்படுத்தியுள்ளது. தயாரிப்பு தரப்பில் இருந்து இதுவரை எந்தவிதமான விளக்கமோ, அறிவிப்போ வெளியிடப்படவில்லை.

பவன் கல்யாண் நடித்து (ஜூலை 24) வெளியான ‘ஹரி ஹர வீர மல்லு’ திரைப்படத்தின் தாக்கத்தை தவிர்க்கவே, ‘சார் மேடம்’ பட வெளியீட்டை கடைசி நேரத்தில் இழுத்துவைத்திருக்கலாம் என்றே கூறப்படுகிறது. விஜய் சேதுபதிக்கும் நித்யா மேனனுக்கும் தெலுங்கு ரசிகர்கள் ஏராளம் என்றாலும், இப்படம் வெளியாகாமல் இருந்தது ஆச்சரியமாகும்.

இப்போது, ‘சார் மேடம்’ அடுத்த வாரம் வருமா, இல்லையா? அல்லது இன்னும் தள்ளிப் போகுமா? என்பது குறித்து எந்தத் தகவலும் வெளியாகவில்லை.