திருவண்ணாமலை: தொடர் திருவிழாக்களை முன்னிட்டு அண்ணாமலையார் கோயிலில் உள்ள உண்டியல்கள் எண்ணப்பட்ட நிலையில், ரூ.3.47 கோடி காணிக்கையாக கிடைத்திருப்பதாக கோயில் நிர்வாகம் தெரிவித்துள்ளது.
பஞ்ச பூத ஸ்தலங்களில் அக்னி ஸ்தலமாக விளங்கும் திருவண்ணாமலை அண்ணாமலையார் கோயிலில், ஆடி கிருத்திகை, கார்த்திகை தீபத் திருவிழா உள்ளிட்ட முக்கிய விழாக்கள் சிறப்பாக கொண்டாடப்படுவது வழக்கம். மேலும், தினந்தோறும் ஆயிரக்கணக்கான பக்தர்கள் உள்ளூர் மற்றும் வெளிமாநிலங்களிலிருந்து வருகை தருகின்றனர்.
இதனால், ஆண்டுக்கு 3–4 முறை உண்டியல்கள் நிரம்பி வழிகின்றன. அப்போது உண்டியலில் பக்தர்கள் போடும் காணிக்கைகள் திறந்து எண்ணப்படும். இவ்வாண்டு நவம்பர் 5 ஆம் தேதி ஐப்பசி பௌர்ணமி மற்றும் நவம்பர் 17 ஆம் தேதி கார்த்திகை தீபத் திருவிழா தொடங்கிய நிலையில் பக்தர்கள் கூட்டம் அதிகரித்தது.
இதன் காரணமாக கோயிலின் உண்டியல்கள் நிரம்பியதால், நேற்று காலை திருக்கல்யாண மண்டபத்தில் உள்ள உண்டியல் மற்றும் கிரிவலப் பாதையில் உள்ள அஷ்ட லிங்கங்களில் வைக்கப்பட்ட உண்டியல்கள் உள்ளிட்ட அனைத்து உண்டியல்களும் திறந்து கணக்கிடப்பட்டன.
உண்டியல் எண்ணும் பணியில் கோயில் ஊழியர்கள், தன்னார்வலர்கள், மாணவர்கள், பெண்கள் என 100க்கும் மேற்பட்டோர் ஈடுபட்டனர். இதில், மொத்தமாக
- ரூ.3,47,56,689 பணமாக,
- தங்கம் 104 கிராம்,
- வெள்ளி 2,690 கிராம்
காணிக்கையாக கிடைத்துள்ளதாக கோயில் நிர்வாகம் தெரிவித்துள்ளது.