திருவண்ணாமலை:
தீபாவளி பண்டிகையை முன்னிட்டு திருவண்ணாமலை அண்ணாமலையார் கோயிலில் பக்தர்கள் பெரும் திரள் கூடியது. அதிகாலை முதலே லட்சக்கணக்கான பக்தர்கள் கோயிலில் சாமி தரிசனம் செய்ய வரிசையில் நின்றனர்.

பஞ்சபூத தலங்களில் அக்னி தலமாக விளங்கும் அண்ணாமலையார் கோயிலில் அதிகாலை 3.30 மணிக்கு நடை திறக்கப்பட்டு அருணாசலேஸ்வரர், உண்ணாமுலையம்மனுக்கு சிறப்பு அபிஷேக, ஆராதனைகள் நடைபெற்றன.

அதனைத் தொடர்ந்து காலை 4 மணி முதலே பக்தர்கள் கோயிலுக்கு வரத் தொடங்கினர். காலை 8 மணிக்குப் பிறகு கூட்டம் மேலும் அதிகரித்தது. ராஜகோபுரம் மற்றும் அம்மணி அம்மன் கோபுரம் வழியாக தரிசனத்திற்கு அனுமதி வழங்கப்பட்டது.

பொது தரிசன வரிசையில் சென்ற பக்தர்கள் சுமார் 5 மணி நேரம் காத்திருந்து சாமி தரிசனம் செய்தனர். பகலில் வெயில் குறைவாக இருந்ததால் எந்தவித சிரமமும் இல்லாமல் பக்தர்கள் தரிசனம் செய்தனர்.

மேலும் ஏராளமான பக்தர்கள் கிரிவலம் மேற்கொண்டு அஷ்டலிங்க கோவில்கள் மற்றும் இடுக்கு பிள்ளையார் கோவிலில் வழிபாடு செய்தனர். இதனால் திருவண்ணாமலை முழுவதும் பண்டிகை ஆனந்தம் நிலவியது.